Lífróður Moggans og samvinna við Baugsmiðla

Það er deginum ljósara að Mogginn rær lífróður Þessi misserin.  Hver einasti maður kominn með björgunarvesti í bátanna og tekur þungt á árunum. 

Það sér hver heilvita maður að íslenskt dagblað, sem er á stærð við meðal héraðsblað í Noregi, getur ekki dragnast með 4,5 milljarða skuldahala á eftir sér. Það verður því fróðlegt að sjá hvort einhverjir auðjöfrar eru tilbúnir til að leggja rekstrinum þá upphæð sem raunverulega dugir til að koma "blaði allra landsmanna" á lappirnar aftur.  

Gríðarleg þekking og reynsla er það sem Mogginn á í dag.  Margir hæfir blaðamenn halda blaðinu gangandi frá degi til dags ásamt velvilja Glitnis.  Í flestum löndum væri fyrirtæki í stöðu Árvakurs löngu komin í gjaldþrotameðferð. Þess vegna finnst mér merkilegt ef einhverjir kaupendur finnast sem virkilega vilja kaupa pakkann án þess að skorið verð af skuldahalanum. Eðlilegra hefði verið að stofna nýtt blað, (Nýja Morgunblaðið,  tíksuheiti á farlitt fyrirtækjum á Íslandi í dag) og nappa til sín bestu blaðamönnunum og Brynjari Gauta. 

Ef kaupendur finnast er þá ekki næsta víst að þeir séu og verði tengdir Baugsfyrirtækjunum á einn eða annan hátt?  Einar Sigurðsson vonast eftir að samstarf við Fréttablaðið um prentun og dreifingu komist á hið bráðasta. Það eitt spyrðir Moggann og Baugsmiðlana saman og eftir því sem mér hefur skylist er Það eitur í beinum Moggafólks.  Ætlar þá Agnes að hætta eða ætlar hún að skríða undir væng Baugs sér til lífsviðurværis?

Ég vona svo sannarlega að Morgunblaðinu verði bjargað.  Mogginn var, hvað sem hver segir, flaggskip íslenskra dagblaða áratugum saman.  Það er því sorglegt að horfa upp á að eftir að blaðið varð frjálslyndara og opnara fyrir öðrum skoðunum og hugsjónum en bara eigenda blaðsins og flokkseigendafélags Sjálfstæðisflokksins er nú komið að fótum fram vegna skulda og lausafjárskorts.

4 hópar áhugasamir um rekstur Árvakurs

Athugasemdir

[Sverrir Einarsson, 6.1.2009 kl. 21:29]

Er þá DV undir hælnum  á Mogga. DV er prentað í Landsprenti, sömu prentsmðju og Mogginn. Er DV ekki í eigu Hreins Loftsonar einn innsti koppur í búri Bónus. Síðan  dreifia sömu bílstjórar DV og Mogga. Þó Moggi og Fréttablaðið sé prentað í sömu prentsmiðju og dreift af sama aðila þá er ekki þar með sagt að Fréttablaðið og Moggi geti ekki haldið sjálfstæði sínu.

[Dunni, 6.1.2009 kl. 21:49]

DV er náttúrulega ekki neitt og skiptir í sjálfu sér engu undir hvaða hæl það er meðan engin tekur mark á því sem í blaðinu stendur.  En það  er augljóst að blaðið er háð Árvakri.  Það kom greinilega fram er ritstjórinn "útvarpaði" að hræðslan við hákarlana réði á hvaða kýlum blaðið styngi.

Mér skilst að Mogginn sé að reyna að skríða undir sængina hjá Fréttablaðinu. Svo það er ljóst að Morgunblaðið gæti orðið háð samstarfinu við Baug. 

Hitt er svo annað að það er langt því frá að þessi blöð séu frjáls og óháð í dag.