Banvænir búrhnífar

Um 40% af öllum manndrápum í Noregi er framkvæmd med hnífstungum. Oftast eru það búrhnífar sem gripið er til þegar einhver skal líflátinn.  Sú var einmitt raunin í Bærum í síðustu viku þegar 18 ára gamall strákur drap besta vin sinn í reiðiskasti.

 

Torleif O. Rognum, prófessor við Réttarlækningastofnunina, segir það ekki auðvelt að finna ráð til að stemma stigu við voðaverkunum meðan hver sem er hefur svo auðveldan aðgang að hnífum sem raunin er í samfélaginu.

  

Préfessorinn segir að það gerist alltof oft að fólk leysi deilur sínar með hjálp hnífa sem æði oft enda með drápi.  Hann segir að full ástæða sé til þess að hafa áhyggjur af því hve algengt það er orðið að menn gangi með hnífa á sér í þeim tilgangi að verja hendur sínar ef á þá er ráðist.  Samt er það í raun bannað að ganga dags daglega með hníf á sér í landinu.

  

Tölfræðin í Noregi segir okkur að dráp með hnífi voru sjaldgjæf á 7. áratug síðust aldar.  Á áttunda áratugnum fjölgaði morðum í landinu og mest fjölgaði þeim morðum þar sem hnífur var morðvopnið.  Frá 9. áratugnum hefur fjöldi morða verið nokkuð stöðugur eða um eitt morð á viku.  En fjöldi hnífamorða eykst jafnt og þétt.

  

Prófessor Rognum finnst hnífsmorð með því ódrengilegra sem hann sér á krufningaborðinu.  Hann segist eiga bágt með að skilja að í samfélagi sem eyði tugum milljarða í að bæta heilbrigðisþjónustuna í þeim tilgangi að bjarga bæði lífi og heilsu fólks finnist menn sem stinga meðbræður sína með hnífum til þess að ryðja þeim úr vegi vegna misklíðar.

  

Rognum segir líka að vegna bættrar bráðaþjónustu um allt landið takist nú orðið að bjarga miklu fleiri sem verða fyrir hnífstungum en áður.  Samt fjölgar þeim sem láta lífið eftir hnífstungur.  Hér þarf mikið átak til hugarfarsbreytingar í samélaginu.

 

En þrátt fyrir að bannað sé að ganga með hnífa á sér þá er ekki hægt að banna fólki að hafa hnífa heima hjá sér.   Þess vegna verða foreldrar, skólar og aðrar uppeldisstofnanir að ala börn upp í umburðarlyndi og að bera það mikla virðingu fyrir mannslífum að þau grípi ekki til hnífa verði þeim sundurorða við einhvern á förnum vegi.

  

Því auðveldari sem aðgangur er að vopnum, þeim mun meiri hætta er á að fólk grípi til þeirra í æðiskasti segir Torleif O. Rognum.