Skuggamyndir úr ferðalagi.

Gleðilega hátíð.

Vaknaði tiltölulega snemma í morgun, kl 10:23. Reif mig framúr og setti kaffið yfir sem síðan lagaði sig sjálft meðan ég þreif mig. 

Að þrifnaðinum loknum kveikti ég upp í arninum og settist í stólinn minn og opnaði eina jólabókina, Suggamyndir úr ferðalgi, eftir Óskar Árna Óskarsson.  Það er skemmst frá því að segja að ég stóð ekki upp úr stólnum aftur, nema einu sinni til að bæta bjarkarbútum á bálið í arninum og hugsa örlítið til fólksins sem ég var að lesa um, fyrr en ég hafði lokið lestri bókarinnar.

Það er nokkuð ljóst að svo lengi sem ég dreg lífsandan mun þessi bók aldrei liggja langt undan. Skuggamyndirnar eru einstaklega vel og fallega skrifaðar. Nálægð höfundarins, virðing og væntumþykja á persónunum er svo einstök að maður verður hvað eftir annað snortinn af lestrinum.  Búskapar og lifnaðarhættir fólks á fyrri hluta síðustu aldar standa manni ljóslifandi fyrir sjónum. 

Skuggamydir úr ferðalagi er ein af bestu bókum sem ég hef lesið.  Mér þykir það ekkert verra að höfundurinn er frændi skáldsins sem orti annað af kvæðunum sem ég held mest upp á af þeim sem ég hef lært, "Þá var ég ungur".  Enda fór það svo að þegar ég lauk lestrinum og stóð upp gekk ég beint að borðstofuborðinu, þar sem koníaksflaskan stóð frá kvöldinu áður, og helti mér í glas og skálaði við bókina og höfundin sem á heima hinu megin við Atlandshafið.

 

Athugasemdir

[Guðný Anna Arnþórsdóttir, 25.12.2008 kl. 17:21]

Þetta er nú einn fallegast ritdómur sem ég hef lesið, vinur kær. Hann verður til þess að nú linni ég ekki látum fyrr en ég hef komist yfir þessa bók.

Eigðu gleðilega hátíð með fjölskyldu þinni! 

[Ár & síð, 28.12.2008 kl. 23:03]

Gleðilega rest, vinur. Þetta er nú svo fínt prógram fyrir notalegan dag að ég ætla að fylgja því við fyrsta tækifæri!

Bestu kveðjur til þín og þinna,
Matti